नवी मुंबईकरांना प्रतीक्षा लागून राहिलेल्या नवी मुंबई मेट्रोचा पहिल्या टप्प्यातील मार्ग या डिसेंबरपर्यंत सुरू करण्याचा विचार सिडको प्रशासन करत आहे. त्या अनुषंगाने ,नवी मुंबई मेट्रो प्रकल्पातील बेलापूर ते पेंधर या पहिल्या टप्प्यातील मार्गावर पेंधर स्थानक ते सेंट्रल पार्क स्थानकादरम्यानच्या ५.१४ कि.मी. च्या अंतरावर सध्या ऑसिलेशन आणि इमर्जन्सी ब्रेक डिस्टन्स चाचण्या घेतल्या जात आहेत. आत्तापर्यंत या चाचण्या सुरळीतपणे पार पडत असून आरडीएसओ कडून या मार्गाला हिरवा कंदील मिळाला तर या डिसेंबरअखेर नवी मुंबईकरांना मेट्रोतून प्रवास करण्याचे स्वप्न पूर्ण करता येणार आहे. मेट्रोच्या ऑसिलेशन आणि इमर्जन्सी ब्रेक डिस्टन्स चाचण्यांची नुकतीच सिडकोचे व्यवस्थापकीय संचालक डॉ. संजय मुखर्जी यांनी पाहणी केली. सदर मार्गावर रिसर्च डिझाइन अॅन्ड स्टँडर्ड ऑर्गनायझेशन (आरडीएसओ) यांच्यामार्फत गत २८ ऑगस्टपासूनमेट्रोची ऑसिलेशन चाचणी घेतली जात असून येत्या १४ सप्टेंबरपर्यंत ही चाचणी सुरू राहणार आहे. या प्रसंगी सिडकोचे सहव्यवस्थापकीय संचालक अश्विन मुदगल, सहव्यवस्थापकीय संचालक कैलास शिंदे, मुख्य अभियंता के. एम. गोडबोले, मुख्य अभियंता (नवी मुंबई), अतिरिक्त मुख्य अभियंता संजय नाडगौडा, महामेट्रोचे तिवारी यांच्या नेतृत्वाखालील आरडीएसओची टीम व कंत्राटदारांचे प्रतिनिधी उपस्थित होते.
नवी मुंबईतील सार्वजनिक वाहतूक व्यवस्था अधिक सक्षम करण्याच्या आणि नवी मुंबईतील नोड परस्परांना अधिक सुलभरीत्या जोडले जावेत या उद्देशाने सिडकोतर्फे नवी मुंबई मेट्रो प्रकल्पांतर्गत एकूण चार उन्नत मार्ग (एलिव्हेटेड कॉरिडॉर) विकसित करण्यात येत आहेत. या मार्गावरील उर्वरित कामे पूर्ण करण्याकरिता सिडकोद्वारा महामेट्रोची नियुक्ती करण्यात आली आहे. मुख्य व्हायडक्ट, आगार प्रवेश व्हायडक्ट, आगार व कार्यशाळा उभारणीची कामे पूर्ण झाली आहेत. तर मेट्रो मार्गावरील स्थानकांची उभारणी, लिफ्ट, उद्ववाहन, फर्निचर आणि प्रणाली (सिस्टीम) आदी कामे प्रगतीपथावर असल्याचे डॉ. संजय मुखर्जी यांनी सांगितले.
भारत सरकारच्या रेल्वे मंत्रालयांतर्गत येणाऱ्या आरडीएसओ या संस्थेवर देशातील विविध रेल्वे प्रणालींचे प्रमाणीकरण आणि समन्वय साधण्याची जबाबदारी आहे. त्यानुसार आरडीएसओ मार्फत सदर मार्ग क्र. १ वरील पेंधर स्थानक ते सेंट्रल पार्क स्थानकादरम्यानच्या ५.१४ कि.मी. च्या अंतरावर मेट्रोची ऑसिलेशन चाचणी आणि इमर्जन्सी ब्रेक डिस्टन्स चाचणी घेण्यात येत आहे. प्रत्यक्ष प्रवासीवाहतूक सुरू करण्याच्या दृष्टीने चाचपणी म्हणून ऑसिलेशन चाचणी अत्यंत महत्त्वाची ठरते. ऑसिलेशन चाचणी पार पडल्यानंतर लवकरच मार्ग क्र. १ वर प्रवासी वाहतूक सुरू करण्यात येणार आहे. मेट्रोची ऑसिलेशन चाचणी हा नवी मुंबई मेट्रो प्रकल्पातील प्रत्यक्ष प्रवासी वाहतूक सुरू करण्यापूर्वीचा महत्त्वाचा टप्पा आहे. यामुळे लवकरच या मार्गावर प्रत्यक्ष प्रवासी वाहतूक सुरू करणे शक्य होणार असून मेट्रोच्या रूपाने नवी मुंबईकरांना जलद, सुखकारक आणि पर्यावरणपूरक प्रवासाचा सक्षम पर्याय उपलब्ध होणार आहे.
– डॉ. संजय मुखर्जी, उपाध्यक्ष तथा व्यवस्थापकीय संचालक, सिडको
Comment here